Lo ministre de l’educacion espanhòl, Ignacio Wert, reconeguèt ièr dins lo Congrès dels Deputats espanhòl que la siá intencion èra d’espanholizar Catalonha. “Lo nòstre interès es d’espanholizar los enfants catalans e que se sentiscan tan fièrs d’èsser espanhòls coma d’èsser catalans”, çò diguèt Wert en responsa al deputat del Partit dels Socialistas de Catalonha (PSC), Francesc Vallès que li demandava d’explicacions per aver ligat l’independentisme al sistèma educatiu catalan. (vidèo)

Wert ven de presentar una reforma educativa que, segon lo deputat socialista, remembra l’educacion del franquisme. D’un costat prepausa de reduccions budgetàrias a l’ensenhament public e d’un autre costat vòl sosténer economicament las escòlas de Catalonha e de las Illas Balearas qu’ajan l’espanhòl coma lenga veïculara, segon lo jornal El Mundo.
 
Lo president espanhòl, Mariano Rajoy, luènh de desautorizar lo ministre, li mostrèt lo sieu sosten. “Aital, coma lo ministre Wert, cal melhorar l’educacion per que totes se sentiscan fièrs d’èsser espanhòls e catalans”, çò declarèt lo president espanhòl a París ont s’èra reünit amb lo president francés, François Hollande.
 
Mentre que lo debat sus l’independéncia de Catalonha es fòrça viu dins lo nòstre país fraire, l’Estat espanhòl reagís s’un biais exorbitant, en fasent volar plan bas d’avions bombardièrs F18 sus Catalonha, en menaçant amb d’intervencions militaras e en demandant a l’Union Europèa de reconéisser pas Catalonha. Quitament lo Parlament catalan foguèt deslotjat per una menaça de bomba dimars passat.
 
 
Lo govèrn espanhòl fa pression sus Brussèlas per qu’accèpte pas Catalonha
 
Dins aquel sens, lo govèrn espanhòl a mandat una letra formala a la Comission Europèa en demandant que totes los membres expliquen la lor posicion per rapòrt a una eventuala independéncia de Catalonha e, tanben, per rapòrt a l’ipotèsi que l’Estat catalan novèl faga partida de l’Union Europèa, segon çò qu’an explicat de fonts de la presidéncia espanhòla a Europa Press. Lo govèrn de Mariano Rajoy ditz tostemps que Catalonha demorariá en defòra de l’Union, mas la vicepresidenta de la Comission, Viviane Reding, o neguèt fa una setmana e diguèt que se fisava de la “mentalitat europèa dels catalans”.
 
Après aquela afirmacion frapanta, e après que lo president de la Comission, José Manuel Durão Barroso, diguèt qu’aquò dependriá que de la legalitat internacionala, lo govèrn espanhòl s’es mes a far pression sus la Comission.

La letra mandada explica, concretament, que i a un article del Tractat de l’Union, lo 4.2, que ditz que se respectarà las identitats nacionalas dels estats membres “inerentas a las estructuras fondamentalas, politicas e constitucionalas”. Amb aquò, lo govèrn espanhòl vòl dire que la secession serà pas pachada e que vendriá illegala. L’escrich parla tanben de l’indivisibla unitat d’Espanha segon la constitucion.
 
 
Lo govèrn espanhòl ditz qu’aquel article del Tractat explica çò que se coneis coma nòrma de “remission”, es a dire, qu’incorpòra çò que l’ordenament juridic de cada estat membre determine. Aquela vision contrasta amb las declaracions de Barroso a la fin del mes d’agost: “Confirmi qu’en l’ipotetic cas de la secession d’una part d’un estat membre, la solucion se deuriá trobar en negociant dins l’ordenament legal internacional”, çò diguèt.
 
En fach, Espanha a pas reconegut l’independéncia de Kosovë perque es declarada de faiçon unilaterala, e a pas cap d’intencion de permetre un referendum sus l’independéncia de Catalonha.
 
 
Manifestacion espanholista
 
Deman, Espanha festeja lo sieu jorn nacional en commemorar la conquista d’America. Dins aquel encastre s’es prevista una manifestacion de “catalans que se sentisson espanhòls”. La manifestacion es convocada amb lo sosten del Partit Popular e de Ciutadans. De partits d’extrèma drecha, coma lo movement franquista de la Falange Espanhòla e lo partit xenofòb Plataforma per Catalonha, an anonciat lo lor sosten e la lor participacion a l’acamp.